పెద్ద తిప్ప సముద్రం ఎంపిడివో కార్యాలయం ముందు ఉద్రిక్తత

 సిరా న్యూస్,అన్నమయ్య;
అన్నమయ్య జిల్లా తంబళ్ళపల్లి నియోజకవర్గం, పెద్దతిప్ప సముద్రం ఎంపీడీవో కార్యాలయం వద్ద ఉద్రిక్త వాతావరణం నెలకొంది. పోలీసులు భారీగా మోహరించారు. తంబళ్ళపల్లి నియోజకవర్గ తెలుగుదేశం పార్టీ ఇంచార్జ్ జయ చంద్రారెడ్డిని పోలీసులు హౌస్ అరెస్ట్ చేసారు. బుధవారం ఎంపిడిఓ కార్యాలయంలో జరగాల్సిన సర్వసభ్య సమావేశాన్ని తెలుగుదేశం కార్యకర్తల అడ్డుకుంటారని ముందస్తుగా ఐదు గంటలకే ఎంపీడీవో కార్యాలయంకి వెళ్లి వైసిపి ఎంపీటీసీ సభ్యులు తాళాలు వేయడంతో ఉద్రిక్త వాతావరణం నెలకొంది. వైకాపా ప్రభుత్వంలో వీరు దొంగ చాటున ఎంపీటీసీలయ్యారు కానీ ప్రజల చేత ఎన్నుకోబడిన వారు కాదని వీరు ఎంపీటీసీ సభ్యులుగా అనర్హులని వీరందరూ వెంటనే రాజీనామా చేసి ప్రజల్లోకి వెళ్లి ప్రజల చేత ఎన్నుకోబడి మీటింగ్ ఏర్పాటు చేసుకోవాలని లేనిపక్షంలో ఈ సర్వసభ్య సమావేశాన్ని ఎప్పుడు అడ్డుకుంటామని తెదేపాశ్రేణులు హెచ్చరించారు. మాజీ మంత్రి పాపాల పెద్దిరెడ్డి గత ప్రభుత్వంలో అధికార యంత్రాంగాన్ని అడ్డుపెట్టుకొని ఎన్నికలు జరపకుండా నియోజకవర్గ వ్యాప్తంగా ఏకగ్రీవం చేసి ఎంపీటీసీలుగా ఎన్నుకోవడంపై తెలుగు తమ్ముళ్లు ఆగ్రహం వ్యక్తం చేసారు. గో బ్యాక్ ఎంపీటీసీ అంటూ తెదేపా కార్యకర్తలు నినాదాలు చేసారు.