సిరా న్యూస్, బేల:
ఆరోగ్యమే మహాభాగ్యం: జిల్లా జడ్జి డా. పి. శివ రాంప్రసాద్..
ఆరోగ్యమే మహాభాగ్యమని ఆదిలాబాద్ జిల్లా జడ్జి డాక్టర్ పి శివరాం ప్రసాద్ అన్నారు. ఆదివారం ఆదిలాబాద్ జిల్లా బేల మండలంలోని సిర్సన్న గ్రామంలో డిఎల్ఎస్ఎ ఆధ్వర్యంలో నిర్వహించిన ఉచిత ఆరోగ్య వైద్య శిబిరానికి ఆయన ముఖ్యఅతిథిగా హాజరయ్యారు. ఈ సందర్భంగా ఆయన మాట్లాడుతూ… ప్రపంచ ఆరోగ్య దినోత్సవం సందర్భంగా గ్రామ పంచాయతీ కార్యాలయంలో ఉచిత వైద్య శిబిరం ఏర్పాటు చేయడం సంతోషకరమన్నారు. మనిషి ఆరోగ్యాంగా ఉన్నప్పుడే ఏదైనా సాధించగలరని, ఆరోగ్యంగా ఉండాలంటే ప్రతి ఒక్కరు ఖచ్చితంగా రోజు కొంత సమయం యోగ చేయాలని ఆయన సూచించారు. ఇలాంటి ఉచిత ఆరోగ్య వైద్య శిబిరాలను గిరిజన గ్రామాల్లో సైతం నిర్వహించాలని ఆయన సూచించారు. అనంతరం ఏర్పాటు చేసిన వైద్య శిబిరంలో చెవి, గొంతు, ముక్కు, కళ్ళ సంబంధిత వ్యాధులతో బాధపడుతున్న పలువురికి వైద్య నిపుణులు ఉచితంగా పరీక్షలు నిర్వహించారు. ఈ కార్యక్రమంలో డిఎల్ఎస్ఎ కార్యదర్శి క్షమా దేశ్ పాండే, మెడికల్ ఆఫీసర్ కృష్ణ వంశీ, ఎంపీవో మహేష్, పంచాయతీ కార్యదర్శి సురేష్, గ్రామ పెద్దలు, వైద్య సిబ్బంది తో పాటు ఆశ వర్కర్లు, వివోఏలు, తదితరులు పాల్గొన్నారు.