నారాయణపేట-కొడంగల్ లిఫ్ట్ పనులు మేఘా, రాఘవ కన్ స్ట్రక్షన్స్ కు అప్పగించటంపై కేటీఆర్ ఆగ్రహం

సిరా న్యూస్;

ఈ ప్రాజెక్ట్ ద్వారా సీఎం రేవంత్ రెడ్డి భారీ ఎత్తున అవినీతికి పాల్పడుతున్నారని మండిపాటు

మంత్రి పొంగులేటి కి చెందిన రాఘవ కన్ స్ట్రక్షన్స్, మేఘా సంస్థకు ప్రాజెక్ట్ పనులను కేకు ముక్కలుగా పంచారన్న కేటీఆర్

ఎల్ అండ్ టీ, ఎన్సీసీ లాంటి కంపెనీలను కాదని అనునయులకు కట్టబెడితే ప్రజలు గమనిస్తారన్న సోయి లేకుండా బరితెగింపా?

సుంకిశాల ప్రమాదానికి కారణమైన మేఘాను బ్లాక్ లిస్ట్ లో పెట్టాల్సింది పోయి…వారికే ఈ ప్రాజెక్ట్ ను గిఫ్ట్ గా ఇచ్చారా?

కాంగ్రెస్ ఖజానా నింపుకునేందుకు తెలంగాణను ఏటీఎం గా వాడుతున్నారని ఆవేదన.

ముఖ్యమంత్రి రేవంత్ రెడ్డి నియోజకవర్గంలో నారాయణపేట-కొడంగల్ లిఫ్ట్ పనులను మంత్రి పొంగులేటికి చెందిన రాఘవ కన్‌స్ట్రక్షన్స్, మేఘా ఇంజినీరింగ్‌ సంస్థలకు కట్టబెట్టటంపై భారత రాష్ట్ర సమితి వర్కింగ్ ప్రెసిడెంట్ కేటీఆర్ ఆగ్రహం వ్యక్తం చేశారు. ముఖ్యమంత్రి రేవంత్ రెడ్డి బరితెగించి అవినీతికి పాల్పడుతున్నారని మండిపడ్డారు. పొంగులేటికి చెందిన రాఘవ కంపెనీకి, మేఘా సంస్థకు ఈ టెండర్లు దక్కేలా చేయటమంటేనే నీకిది-నాకది అని క్రోని క్యాపిటలిజానికి పాల్పడుతూ అధికారాన్ని దుర్వినియోగం చేయటమేనని అన్నారు. ఎల్ అండ్ టీ, ఎన్సీసీ లాంటి పెద్ద కంపెనీలకు టెండర్లు దక్కకుండా కావాలనే కుట్ర చేశారని కేటీఆర్ చెప్పారు. ఎల్ అండ్ టీ, ఎన్సీసీ లాంటి సంస్థలను టెక్నికల్ రీజన్స్ పేరు చెప్పి డిస్ క్వాలిఫై చేస్తున్నప్పుడు దీనిపై ప్రజలు ఏమనుకుంటారోనన్న సోయి తప్పి సిగ్గులేకుండా ప్రవర్తించారని ఆగ్రహం వ్యక్తం చేశారు.

ఏలాగైన మేఘా,రాఘవ సంస్థలకు ఈ ప్రాజెక్ట్ కట్టబెట్టాలని మీరు చేసిన తప్పుడు ప్రయత్నాలను ప్రజలు గమనిస్తున్నారన్నారు. ఈ రెండు సంస్థలు చెరి సమానం కేక్ ను పెంచుకున్నట్లు 3.9 శాతం, 3.95 శాతం పంచుకునే విధంగా బిడ్ లు వేయటమంటే ఇందులో మతలబు ఏంటనీ ప్రశ్నించారు. ఇంత బరితెగించి అవినీతికి పాల్పడుతున్న కాంగ్రెస్ ప్రభుత్వానికి కచ్చితంగా ప్రజలు బుద్ది చెబుతారన్నారు.
సుంకిశాల లో ప్రమాదం కారణంగా ప్రభుత్వానికి రూ. 80 కోట్లు నష్టం చేసిన మేఘా కంపెనీకి పనులను ఎందుకు కట్టబెట్టారో చెప్పాలని కేటీఆర్ డిమాండ్ చేశారు. ఈ ప్రమాదానికి కారణమైన మేఘా సంస్థను బ్లాక్ లిస్ట్ లో పెట్టాలని హైద్రాబాద్ మెట్రోవాటర్ బోర్డు రిపోర్ట్ ఇచ్చినప్పటికీ ఎందుకు మేఘా మీద రేవంత్ రెడ్డికి అంత ప్రేమ అని కేటీఆర్ ప్రశ్నించారు. ఒకప్పుడు ఈస్ట్ ఇండియా, ఆంధ్రా కంపెనీ అంటూ ఏ మేఘా కంపెనీపై రేవంత్ రెడ్డి ఆరోపణలు చేశాడోఇప్పుడు అదే కంపెనీకి సిగ్గులేకుండా ఎందుకు ప్రాజెక్ట్ పనులను అప్పగించారో చెప్పాలన్నారు. బ్లాక్ లిస్ట్ లో పెట్టాల్సిన కంపెనీకి రేవంత్ రెడ్డి తన డ్రీమ్ ప్రాజెక్ట్ ను బహుమానం గా ఇవ్వటం వెనుక భారీ అవినీతి కుంభకోణం ఉందని కేటీఆర్ అన్నారు.

ఆరు గ్యారంటీలు, 420 హామీల అమలు, రైతులకు రైతు భరోసా ఇచ్చేందుకు పైసలు లేవన్న రేవంత్ రెడ్డి…ఇంత ఖర్చుతో ఎవరి జేబులు నింపే ప్రయత్నం చేస్తున్నారో చెప్పాలన్నారు. ఓ వైపు తెలంగాణ ప్రజలు మీ చేతగాని పాలనలో బాధపడుతుంటే…మరో వైపు మీరు మాత్రం ప్రజాధనాన్ని లూటీ చేసే పనిలో నిమగ్నమై ఉన్నారని విమర్శించారు. మొత్తం రూ. 4,350 కోట్ల ఈప్రాజెక్ట్ ను మేఘా, రాఘవ సంస్థ లకు అప్పగించి వారి ద్వారా వేల కోట్ల రూాపాయలను కాంగ్రెస్ ప్రభుత్వం కొల్లగొట్టనుందన్నారు.తెలంగాణ ప్రజలు కాంగ్రెస్ కు అధికారం అప్పగిస్తే వాళ్లు మాత్రం దేశ వ్యాప్తంగా తమ
పార్టీ ఖజానా నింపుకునేందుకు రాష్ట్రాన్ని ఏటీఎం గా వాడుకుంటున్నారని ఆవేదన వ్యక్తం చేశారు. మేఘా, రాఘవ కన్ స్ట్రక్షన్ అవినీతి బాగోతాన్ని వదిలిపెట్టే ప్రసక్తే లేదని…మీ అవినీతి పాలనపై పోరాటం చేస్తూనేఉంటామని కేటీఆర్ స్పష్టం చేశారు.