సిరా న్యూస్;
హిమాలయాలు. లక్షల ఏళ్ల క్రితం మొదలైన ఒక మహా నిర్మాణం. ఈ నిర్మాణం ఇంకా కొనసాగుతూనే ఉంది. ఆ నిర్మాణం జరుగుతోంది కాబట్టే ఏడాదికో సెంటీమీటర్ పెరుగుతూ పోతోంది. దీంతో పాటే ఉష్ణోగ్రతలు కూడా పెరుగుతున్నాయి. హిమాలయాలు పెరుగుతుంటే ప్రమాదం లేదు గానీ.. అక్కడున్న మంచు కరిగితేనే యమ డేంజర్. ఆ ప్రమాదం వెనకున్న ముప్పును అంచనా వేయడం కూడా కష్టమే.మరో 75 ఏళ్లలో.. అంటే 2100 సంవత్సరం నాటికి హిమాలయాలపై ఉన్న మంచు 75 శాతం కరిగిపోతుందని అంచనా వేస్తున్నారు. అదే జరిగితే.. భారీ జల ప్రళయమే వస్తుంది. ఆ మంచు కాస్తా పూర్తిగా కరిగిపోతే.. అప్పుడిక జలప్రళయాలు కాదు.. నదులే ఉనికి కోల్పోతాయి. గంగ, యమున, బ్రహ్మపుత్ర, సింధు నదులు భారతదేశంలోని 40 శాతం మందికి నీటిని అందిస్తున్నాయి. ఈ నదుల నీరే.. తాగునీటి అవసరాలకు, పంటలు పండించడానికి, పరిశ్రమలకు ఉపయోగపడుతున్నాయి. సో, హిమాలయాల్లోని మంచు మొత్తం కరిగిపోతే ఉత్తర భారతదేశమే ఉండదు. అంతకంటే ముందు మరో ప్రమాదం జరిగే అవకాశం ఉంది. మంచు కరుగుతున్న కారణంగా సముద్రమట్టాలు కూడా పెరుగుతాయి. ఇవి దేశంలోని తీరప్రాంతాలను సముద్రంలో కలిపేసుకునే ప్రమాదముంది.హిమాలయాలు కరుగుతున్నాయంటే.. మిగిలిన చోట్ల కూడా అదే పరిస్థితి ఉంటుంది. సో, దీవులు మునిగిపోతాయి. ఆ తరువాత తీరప్రాంతాలన్నీ శాశ్వతంగా జలసమాధి అవుతాయి. ఇప్పటికే, హిమాలయాల్లో సరస్సులు పెరుగుతున్నాయి. ఎక్కడైనా సరస్సులు పెరిగితే సంతోషిస్తారు. కాని, అదే పని హిమాలయాల్లో జరిగితే మాత్రం భయపడతారు. అవన్నీ కట్టలు తెంచుకుని విరుచుకుపడేది జనావాసాలపైనే. 2000 నుంచి 2020 మధ్య 1.7 గిగా టన్నుల మంచు కరిగిపోయిందని లెక్కవేశారు. అంటే అటుఇటుగా రెండు లక్షల కోట్ల కిలోల మంచు.హిమాలయాల్లోని మంచు కరిగిపోతే.. అక్కడ జీవవైవిధ్యం దెబ్బ తింటుంది. అక్కడి వాతావరణం కారణంగా ఎంతో విలువైన ఆయుర్వేద మూలికలు పెరుగుతున్నాయి. అవన్నీ మాయం అవుతాయి. చలి ప్రాంతంలో జీవించే జంతువులన్నీ అలాంటి ప్రాంతం కోసం వెతుక్కుంటూ వెళ్లే క్రమంలో అంతరించిపోతాయి కూడా.సాధారణంగా హిమాలయాల వంటి ప్రదేశాల్లో ఉష్ణోగ్రతలు ఒక్కశాతం పెరగడమే ప్రమాదం. వాతావరణం అల్లకల్లోలంగా మారుతుంది. అలాంటిది రెండు డిగ్రీల ఉష్ణోగ్రత పెరిగింది. దీనికి కారణం ఆధ్యాత్మికత పేరుతో పెరుగుతున్న పర్యాటకం. అక్కడికి వెళ్లే వారికి సౌకర్యాలు కావాల్సి వచ్చింది. రోడ్లు, సొరంగాలు, బిల్డింగులు, బ్రిడ్జిలు ఎడాపెడా కట్టేశారు. నిర్మాణాలకు, నిర్వహణకు కరెంట్ కావాల్సి వచ్చింది. అంతే, అక్కడే భారీ జలవిద్యుత్ కేంద్రాలు నిర్మించారు. ఎక్కడైనా సరే.. నిర్మాణాలు జరిగితే ఆటోమేటిక్‌గా ఉష్ణోగ్రతలు పెరుగుతాయి. దీనికితోడు అక్కడి వాతావరణం కాలుష్యమయం అవుతోంది. అక్కడ పడేసే చెత్త అంతాఇంతా కాదు. అమర్‌నాథ్ యాత్ర జరిగితే.. ఆ ఏడాది కనీసం వెయ్యి టన్నుల చెత్త తయారవుతోంది. భక్తులే ఇలా ఉంటే పర్యాటకులు ఇంకెలా ఉంటారు. అందుకే ఎవరెస్ట్‌కు మరో పేరు ఉంది. 2004 నుంచి 2020 మధ్య హిమాలయాల్లో 840 చదరపు కిలోమీటర్ల విస్తీర్ణంలో ఒక పెద్ద మైదాన ప్రాంతం ఏర్పడింది. 2004 ముందు వరకు ఆ మైదాన ప్రాంతమంతా దట్టమైన మంచుతో కప్పబడి ఉండేది. సో, 2100 సంవత్సరం నాటికి హిమాలయాల్లోని 75 శాతం మంచు కరిగిపోతుందనే చెప్పాలి. టిబెట్‌లో ఏర్పడిన సింధు నది వల్ల పాకిస్తాన్ ఏకంగా 90 శాతం ఆహార ఉత్పత్తులను తయారు చేసుకోగలుగుతోంది. రేప్పొద్దున సింధు నది అన్నదే లేకపోతే.. పాకిస్తాన్ కూడా లేనట్టే. అందుకే పాకిస్తాన్ ఇప్పుడు టెన్షన్ పడుతోంది. నిజానికి హిమాలయాల వల్ల 8 దేశాలు లాభం పొందుతున్నాయి. సో.. వీటి సంరక్షణ బాధ్యత అన్ని దేశాలది అని మర్చిపోకూడదు. కానీ పాకిస్తాన్ ఈ విషయంలో ఇంకొంచెం ఎక్కువగా శ్రద్ధ చూపాలి. లేదంటే దానికి డేంజర్ బెల్స్ మోగుతున్నట్టే.హిమాలయాల్లో మంచు కింద ఏముందో తెలీదు గానీ.. ధ్రువ ప్రాంతాల్లో సూక్ష్మక్రిములు, బ్యాక్టీరియా పెద్దమొత్తంలో ఉండొచ్చని చెబుతున్నారు. మంచు కరిగి, ఆ వాతావరణానికి డీకంపోజ్ అయితే.. అదే ఉష్ణోగ్రతలను మరింత పెంచుతుంది. ఇక్కడ మరో ప్రమాదం కూడా ఉంది. వందల ఏళ్లుగా మంచుకింద కప్పబడి ఉన్న వైరస్‌లు మళ్లీ ప్రాణం పోసుకుంటాయట. అదే జరిగితే.. కొత్తకొత్త వైరస్‌లు మనిషిపై దండెత్తే అవకాశం ఉంది. ఒకవేళ ఆ ప్రమాదం ధ్రువప్రాంతాల్లో కాకుండా హిమాలయాల్లోనే జరిగితే..? ఇప్పటికైతే అలాంటి ప్రమాదం ఉందని ఎవరూ చెప్పలేదు. కాని, ఎవరూ చెప్పనంత మాత్రాన, ఇప్పటి వరకు కనుక్కోనంత మాత్రాన అక్కడ ఆ ప్రమాదం లేదని చెప్పలేం. సో, హిమాలయాల్లో మంచు కరగడం ఈ విధంగా కూడా ప్రమాదకరమే అని చెప్పాలి. అందుకే ప్రభుత్వాలు ఇప్పటికైనా హిమాలయాల పరిరక్షణకు నడుం బిగించాలి. హిమాలయాల రక్షణకు కార్యాచరణ ప్రణాళికను తక్షణమే అమలు చేయాలి. అప్పుడే ముప్పు నుంచి కొంతైనా తప్పించుకోగలం. చిన్న గ్లేసియర్స్ కరిగితేనే ఇంత ప్రమాదం జరిగితే.. హిందూకుష్ ప్రాంతంలో ఏకంగా 54 వేల గ్లేసియర్లు ఉన్నాయి. ఇవన్నీ దాదాపు 60 వేల చదరపు కిలోమీటర్ల పరిధిలో ఉన్నాయి. అవన్నీ కరిగితే.. జరగబోయే ప్రళయం ఊహకైనా అందుతుందా? అసలు ఆ ప్రమాదం దిశగా ఎవరైనా ఆలోచించారా?ఒకప్పుడు హిమాలయాల్లో చాలా తక్కువ ఎత్తులోనే మంచు కనిపించేది. 1976లో హిమాలయాలకు వెళ్లినప్పుడు.. 4వేల 900 మీటర్ల ఎత్తు చేరే సరికే మంచు రేఖ కనిపించేది. 2006లో వెళ్లినప్పుడు 5వేల 200 మీటర్లకు వెళ్తే గానీ మంచు కనిపించలేదు. అంటే, మంచు 300 మీటర్లు తగ్గిపోయినట్టే కదా. మంచు కరిగితే ఏమవుతుందిలే అని అనుకుంటాం గానీ.. ఈమధ్య లాజ్ఏంజెల్స్ నగరం ఎంత పెద్దగా ఉంటుందో అంత పెద్ద మంచు ఫలక కరిగిపోయిందట అంటార్కిటికా ధ్రువ ప్రాంతంలో. ఆ నీరంతా ఏమైపోతుంది? చివరికి సముద్రంలోనే కలుస్తుంది. అంటే సముద్రమట్టం పెరుగుతుంది. కేరళలో మొదలయ్యే నైరుతి రుతుపవనాలు హిమాలయాలను తాకి అవే ఈశాన్య రుతుపవనాలుగా మారతాయి. ఇలా దేశమంతటా రుతుపవనాలు విస్తరించడానికి హిమాలయాలే కారణం అవుతున్నాయి. యూరప్ నుంచి విపరీతమైన చలిగాలులు మన దేశం వైపు వస్తుంటాయి. ముఖ్యంగా సైబీరియా ప్రాంతం నుంచి. కాని, ఆ అతి చల్లని గాలులను అడ్డుకుంటున్నది మన హిమాలయాలే. అవే గనక లేకపోతే, ఉత్తర భారతదేశం అంతా చలితో వణికిపోయేది, మంచులో గడ్డకట్టుకుపోయేది. అంటే, హిమాలయాలు లేకపోతే భారతదేశ ఉనికే ఉండదు. ఇదే ఇప్పుడు శాస్త్రవేత్తలను కలవరపెడుతోంది. అందుకే పాలకులు కూడా తక్షణం దీనిపై దృష్టి సారించాల్సిన అవసరముంది. హిమాలయాల సంరక్షణకు అనుగుణంగా తక్షణం కార్యాచరణ ప్రణాళికను అమలు చేయాలి.సో, ఉష్ణోగ్రతలు పెరగకుండా అడ్డుకోవాల్సిన అవసరం ఉంది. లేకపోతే.. మరో 75 సంవత్సరాల తరువాత భారతదేశానికి ఒక కోటలా రక్షణనిస్తున్న హిమాలయాలు కనుమరుగవుతాయి.
======================