సిరా న్యూస్,ముంబై;
మీ ఇంటి పరసరాల్లో చెత్త పేరుకుపోతోందా.. దుర్గంధం వెదజల్లుతోందా.. కుక్కలు, పందులు స్వైర విహారం చేస్తున్నాయా.. డ్రెయినేజీ నీరు పొంగి రోడ్లపైకి వస్తోందా.. దుర్వాసన భరించలేకపోతున్నారా.. రోడ్లపై నడవడం ఇబ్బందిగా ఉందా.. అయితే ఈ సమస్యలన్నింటికీ ఒకే ఒక పరిష్కారం ఆ యాప్ చూపిస్తుంది. ఇందుకు మీరు చేయాల్సిందల్లా ఆ యాప్‌ను డౌప్‌లోడ్‌ చేసుకుని అందులో మీ ఇంటి పరిసరాల్లో పేరుకుపోయిన చెత్త, మురికి నీటి ఫొటోలను అప్‌లోడ్‌ చేయడమే. ఇంతకీ ఆ యాప్ ఏంటి.. ఎలా పనిచేస్తుంది అనే వివరాలు తెలుసుకుందాం.ఇండియన్‌ మినిస్ట్రీ ఆఫ్‌ అర్బన్‌ డెవలప్‌మెంట్‌ అథారిటీ ఈ యాప్‌ను లాంచ్‌ చేశారు. దానిపేరే స్వచ్ఛత. దీనిని గూగుల్‌ ప్లేస్టోర్‌ లేదా యాప్ స్టోర్ నుంచి డౌన్‌లోడ్‌ చేసుకోవాలి. మీ మొబైల్‌ నంబర్‌తో లాగిన్‌ అవ్వాలి. తర్వాత యాప్‌లో మనకు సంబంధించిన అనేక సమస్యలు అందులో కనిపిస్తాయి.యాప్‌లో మీరు ఏ సమస్య ఎదుర్కొంటున్నారో ఆ ఆప్షన్‌ సెలక్ట్‌ చేసుకోవాలి. తర్వాత మీ సమీపంలో ఉండే సమస్యకు సంబంధించిన ఫొటోలను తీసి అప్‌లోడ్‌ చేయాలి. ఇది పూర్తిగా జీపీఎస్‌తో కనెక్ట్‌ అయి ఉంటుంది. ఫొటోతోపాటు లొకేషన్‌ కూడా ఆ ఏరియాలో క్లీనింగ్‌ చేయించే సీనియర్‌ ఆఫీసర్‌కు వెళ్తుంది. వాళ్లు సిబ్బందిని పంపించి క్లీనింగ్‌ చేయిస్తారు.
అధికారులు సమస్య పరిష్కరించిన తర్వాత దానికి సంబంధించిన ఫొటోలను తీసి మళ్లీ అదే యాప్‌లో అప్‌లోడ్‌ చేస్తారు. ఈ సమాచారాన్ని మున్సిపల్‌ ఆఫీసర్‌కు కూడా పంపించాల్సి ఉంటుంది. ఇంటి పరిసరాలు శుభ్రంగా ఉంటేనే వ్యాధులకు దూరంగా ఉంటాం. అందేకే కేంద్రం ఈ స్వచ్ఛత యాప్‌ను తీసుకువచ్చింది. ఇంకేముంది మీరు ఈ యాప్‌ను డౌన్‌లోడ్‌ చేసుకుని మీ సమస్యకు మీరే పరిష్కరం చూపండి.